1Pe 2 | BEF | STEP | To ya huto ni'igo lenali foipanatini asaga'i li he'milo. To faga lilatana, kenetufatini loemo minolatana, to komopatinigu siko hilatana, huli ka ai lu emigo ai lu emigo hilatana yamofihi he'mi su halo.

1 Peter 2

Sipi Boti amuya moloto minoba minoba efahi suhi huto nohibe

1 To ya huto ni'igo lenali foipanatini asaga'i li he'milo. To faga lilatana, kenetufatini loemo minolatana, to komopatinigu siko hilatana, huli ka ai lu emigo ai lu emigo hilatana yamofihi he'mi su halo. 2 He'mi su hete yagapana'i ya suhi hite lenali Hu'mamofihi hetofa kaga'muko lepesinogo minalo. To yamofihi nemebite Hu'mamofihi ka'a hiti minete hofa talabe. To Hu'mau foipana nagaluguti lenele'mo gulu halibe. 3 Yana'amu mono bukugu ma lite fayahi keye'ahana ni'ibe:Sipi Boti komopa emise'na laga'a kehelilana lenali mino bati hilabe.

4 Lenali Sipi Boti mino lito buto minolata nohina efahi legi huto nohibe. Bona'magi bu ge he'migo Hu'mau keheligo mina'a hiti tigo yauba le'mo'ehibe. Ya higo lenali aitoga bite hepilo. 5 Ya lite nehite lenali ana suhi hite mino lito minolata nohina efahi lolo hi su helete aitoga molo emite mine lite bite tilo. Tite Hu'mamofihi Sikalafu'amofihi mono noha'amofihi gise efapo lolo hilabe. Ya hilete ana nonugu mamufa gi emilata bona'i eto eto hite lolo hilabe. Hu'mamofihi Sikalafu'mofihi nasana kuguhi koyo emilenogo Yesu Kilisitotoga nebinogo keheli laga hilibe. 6 Yamofihi mono bukugu kaga lite fayahi keye'ahana ma luto ni'inamo ni'ibe:

Nani amuya kefahi mone mina'a tito ni'ina
li gehe lito ale'mo'ohube.
Yamofihi le'mo eto huloto Yiona melugu
efaha'a lapusa nofugi bu galo.
Ai kumu keheli amuya malalanamagi
enubuya mehilina'mu yabe.

7 Ya ligo keye'ahana'mu ai kumu keheli amuya nemalana lenalitoga yamu'i ai ana'ina mina'a minomo tito nohibe. To ai kumu mekehelise mine'ahana'a enali kumu mone ya'ma luto lu'ehinamo ni'ibe:

Nohi gilata bo
enali efahi ya'mu bu gago he'mi'ahana
ya'ma efapouba
lapusa lolo hu'ehina ni'ibe.

8 To mono bukugu fayahi mone ma luto ni'ibe:

Ana efatoti i kusulu bite
limilana'mu yabe.
To ana efapolo ho kete
enahalina'mu yabe.

Ana kaga keye'ahanamofihi hapa'a ya'ma ni'ibe. Bona'i enali Hu'mamofihi ka'a keheli he'milata nehana enali kusulu bite limilana'mu yabe luto lu'ehinamo ni'ibe. Ya hite bite, ya suhi hilata nehabe luto Hu'mau ya'ma lu molo'ehina yabe.

9 Ya hu'ehinaya lenali ya'ma lenele'mo eto hu'ehina bona'i yagi gihiti bomofihi mamufa gi emilatana bona'i lolo hite hetofa kapolo tite nupa hi'ahana bona'i to Hu'mamofihi naga'a lolo hite nehabe. Lenali kumu kehe ito metepuguti buyu huto lenele'moto hetofa fana tose'namofitoga lenele'mo molo'ehina yabe. Lenali Hu'ma ai hetofa hatofa hapa'a lu huto hinogo i futili hilabe. Ya hilabe luto lenele'mo'ehibe. 10 Koyapa'i lenali Hu'mamofihi bona'a memine'ahana. Yatai ya'ma Hu'mamofihi naga'i lolo hite neminabe. Koyapa'i lenali mino bati hite memine'ahana. Yatai ya'ma Hu'mau ginaga fi limise bomofihi komopa'agu nehabe.

Hu'mamofihi koko yagapana'a minalune

11 Nigibo nalalu'nigita, nani lenegekesa lito lu lepilugi kehelilo. Lenali Hu'mau kokulumagu nohina bomofihi naga'i nehanagi ya'mu ma metoga bonoho bo suhi hite to ka'i logo lili bo suhi hite minetetini lenugufatini laga lepesilatana nohina yauba komopatini luba li emilata nasanaya he'milo. 12 Ya nehite Hu'mamofihi mekeheli'ahana bona'magihi komopa'ani legi mehinogo mino eto hite minalo. Ya hite nehinogo Hu'mamofihi mekeheli'ahana bona'magi kohe tete lenali kumu foipana lilata nehana bona'i nehabe lite lenifisa ite aku alihi to lenali bite folagaha'anigu minenogo to hapatini bati hinogo enali bu negenogo yata'a kehelise'na'ani he'mite lenali kumu Hu'mamofihi fokeha'a lilabe. Yesu Kilisitou nehetilina kanagu ya hilana'mu yabe.

13 Lenaliya, ma metoga nehana kaba bo fato fato'mofihi nehabe. Ya'mu lenali Sipi Bomofi kumu yabe lite koko'i hi epite minalo. Mone sipi gihiti bouba ai asaga kaba bomagihi enebege ligito minomo tito nohibe. Aimo agoya hi emilo. 14 To mone gamani bona'magihi agoya hi epilo. To enali lu laga hilatana keheli epilo. Ya'ma sipi gihiti bouba gamani bo'amagihi enoho lifi'ehina'a enali ya'ma foipana lolo hilata nehana bona'i enali osahi epilabe. To kaga'ani kehelite ana'ina lamana'a lite minelatana neminana bona'i enofokehi lu epalalabe luto, Hu'mau ana gamani bona'i enele'mo ho ti'ehina ni'ibe. 15 Lenali ya hilata nehana lamana'a lolo hilana yauba enabagalo hekini nolago lenali kumu negi nagi ka lilata nehana enabaga enele'mo fu li epalalabe luto ligo Hu'mau keheli molo'ehina. 16 Lenali lu laga hu'ehina kauba nagaluguti gulu ho leto'ehinamo ni'ibe lite kehelite minalo. To lenali foipana lite fala kilabe luto gulu ho lepolo'ehina ni'ifiye? O'e, ya hu lepolo'ehina yauba foipanamofihi legeya'a lolo mehilibe. Lenali ule'ale hite minete Hu'mamofihi kele kele'i hi etete minalo. 17 Lenali silaga bona kumu keheli bati hite keheli epilo. To Hu'mamofihi ka keheli nehanamagitoga komopatini epilo. To Hu'mamofi kumu koli hite aitoga agoya hi emilo. To ma metoga gihiti bo'mu keheli bati hite minalo.

Kilisito ginaga fi limito lele'mo kohe to'ehibe

18 To lenali bona'magihi koko panana'ani nehanamagita, lenali kaba botini kumu keheli bati hite minete ka'ani keheli epilo. To fuluna'a lepilana komopa'ani bati higo mine'ahana bona'i enalisigo meni'ibe. Enali kele'na ka lu lepilana bona'magihi ka'ani ana hite kehelilo. 19 To kaba botini lenele'mo sibina hilenogo lenali Hu'mamofi kumu lite kehelite komopatini emilete fa'mene neminenogo Hu'mau ai keke'i luse'namofihi lenugupisalo ni'igo bu goto keheliloto lusa gi lepoloto lenele'mo bati hilina'mu yabe. 20 To lenali kegeiyo hite minenogo osahi lepinogomo lenagabu gise'namofihi lite enipakafa mehese minenogo moneuba kiyi'afu keke'i lu lepalalibe? Ya mehilina'mu yabe. To lenali bati hite minenogo lenebe ligilina lenagabu gise nasana li lepinogo enipakafa mehese to kosele'i melenehenogo minalo. Ya hinogo Hu'mau kehelito hetofana hu lepalalina'mu yabe. 21 Lenali ya suhi hilabe luto elesa molo lepi'ehinamo ni'ibe. Kilisitou ai'a ana suhi huto lenali kumu yabe luto keke'i luse'namofihi gupisalo tito minoto lenele'mo kohe to'ehinamo ni'ibe. Lenali ya hu'ehina'mu lite mege'i melete bilo. 22 Ai foipana mehuse'i to baga'aguti faga meluse'i mino'ehinamo ni'ibe. 23 Enali huli ka lu emilago ai ka nona'a lu meepi'ehinamo ni'ibe. To osahi emilago ai enipakafa mehose fa'mene minoto kaga'ani loko hilina bo, Hu'ma ai bati hu epololata bo, aitoga mino moloto fifa ito mino'ehinamo ni'ibe. 24 Lali foipanati yauba ai gupisalo tigo ai'a he'mu kito malipu yafalo fili'ehinamo ni'ibe. Lali foipana lilutana'mu filise bona'i suhi huto mopo mehuse'na minoto bati bati huto minolatanamofihi minete lite hilabe luto fili'ehinamo ni'ibe. To ai fuhe'a li'ehinaloti'i komopatini le'mo kosaba hu'ehinamo ni'ibe. 25 Lenali sipisipi yaga suhi hite lopi fite mine'ahanamo yabe. Yatai ya'ma lenemehatinimofihi kaba bo'a ai lenele'mo behe higo aitoga huto hite neete mege'i nemalabe.